Молитвы для заключенных
Молитва заключенного к Божией Матери
О, Пресвятая Дево, Мати Господа и Спасителя моего! Вси человецы притекают к Тебе и никто притекаяй отходит от Тебе всуе, аще о добре просит. Молят Тя архиерее и священницы, яко Матерь еси Архиерея Великаго, прошедшаго небеса. Молят Тя иноки и инокини, яко Сама еси Пречистая Дева. Молят Тя отцы и матери, иже соболезнуют о своих детях, в немощех лежащих или далече живущих, яко Ты Сама болезнующи искала Сына своего, егда Он, дванадесятилетний отрок, оста во Иерусалиме. Молят Тя обидимии, яко претерпела еси гонение от Ирода с Божественным Младенцем. Возносят к Тебе последнюю свою молитву умирающии, яко Ты предстояла еси у Креста умирающаго Сына Твоего. Молят Тя праведнии и вси хотящии благочестно жити: и никтоже от них достиже праведности, не имеяй Тебе молитвенницу. Тако вси имут Тя заступницу усердну и всем подаеши скору помощь. Един ли аз, грешник, в темнице седяй, забвен буду от Тебе? Мене ли единаго молитву не услышиши? Мене ли, прибегающаго к Тебе, не приимеши под кров Твой? О, никакоже помышляю сему быти. Понеже Матерь еси Спасителя погибающих грешников. Понеже яко несть иного Бога разве Иисуса Христа, Сына Твоего, со Отцем и Святым Духом во Едином Божестве покланяемаго. Тако несть инаго у Престола Божия ближайшаго ходатая, якоже Ты, Мати Божия! Матернее моление много может ко благосердию Владыки. Пред Ним Тебе вся возможна суть. Сего ради на Тя по Бозе все упование мое возлагаю. Сего ради храню аз пречистый образ Твой во узилищи моем, памятуяй близость Твою ко всем скорбящим и заключенным. Обаче Ты Матерь Божия, и являла еси доныне ко мне многая милости по моим прошением к Тебе! Чимже аз явихся пред Тобою? Увы мне злонравному! Аз же непамятлив бых Твоих благодеяний. Но, о милосердая Царице Богородице, прости моя измены и неразумие, не отвергни мене, паки возвращающагося к Тебе, яви ко мне древняя Твоя милости и приими мя на Свои мощныи руки, аки боляща, аки еле жива суща от язв греховных. Приведи мою душу грешную к покаянию. Беззакония бо моя превзыдоша главу мою. Колико доселе прогневах аз Бога моего лжами, хищениями, пиянством, крамолами, жестокосердием, безсовестием. Безпрестани согрешаю и в сей темнице леностию, мечтаниями, обманами, непокорством, досаждениями соузникам моим и развращением их, татьбами и роптанием на мою участь. Ктому не бысть у мене доныне ни слез, ни умиления, или же аз плаках токмо от досады моея. Примири убо мене, Благодатная, с Богом, Сыном Твоим. Сподоби мя получити разрешение во всех гресех моих в тайне покаяния, и абие причаститися Святаго Тела и Крове Сына Твоего. Помози ми отныне возненавидети злыя мои страсти и крепко воинствовати противу греха; зане аще в чесом и покаюся, по малом часе таяжде творю, и сице лжив пред Богом обретаюся. Испроси ми, Владычице Богородице, благодать прочее время живота моего в твердом покаянии скончати. Милующая грешники, не презри мене перваго из них. Зриши моя беды, зриши мою горьку жизнь в сей темнице. Помози ми претерпети до конца позор мой, тесноту и прочия темничныя лишения, да не впаду в отчаяние, да не дерзну возносити хулы на Промысл Божий, но токмо скорблю и плачу о гресех моих, токмо от печали моея о чадах моих и сродниках, от нихже разлучен есмь, обращаюся ко утешению в молитве. Несть у меня терпения и кийждо день мню, яко наста конец моему терпению. О, печалъных недоведомое утешение! Утеши моего отца и матерь со сродники, иже скорбят о мне, для нихже аз содеяхся яко мертв. Наипаче же, о чадолюбивая Мати! не лиши Твоего покровительства жену и чада моя, ихже оставих аз, яко преступный отец, зане они неповинни суть во гресех моих. Препитай их и сохрани Твоею молитвою здравы и богобоязненны. Даруй ми, напоследок, видети свободу и со слезами радости облобызати моих домашних. Из глубины души моея вопию к Тебе, Царице Небесная, от одного образа Твоего с предвечным Младенцем на руку Твоею держимым чувствуяй в сердце моем отраду: не отрини мене, буди ми покровительница во всяких моих нуждах, во всяком моем страхе и унынии, днем и нощию, во здравии и болезни. Облегчи моя душевныя и телесныя скорби, яко Ты еси всех скорбящих радость. Милостива буди ми не зде токмо, но и тамо, в стране вечней. Не остави мене без Твоего заступления в день Страшнаго Втораго Пришествия Господа моего. Ей, Пресвятая Богородице! Не забуди тогда моея веры, яже к Тебе, и недостойных моих молитв пред Тобою. Да тако, быв на вечныя времена помилован Тобою, в безконечныя же веки буду благодарити Тебе и славословити Отца и Сына и Святаго Духа, аминь.
Молитва заключенного к св. Иоанну Предтече
Предтече и крестителю Христов Иоанне, проповедниче покаяния! Ты неповинне всажден был еси в темницу: аз же, вверженный в злоключение сие, достойное по делом моим приемлю, яко преступник правды и закона. Всели в мое сердце чувство покаяния о гресех моих! Несть бо ни единыя злобы ни беззакония, ихже аз, окаянный, не содеях; престрашни греси мои. Учителю правды! научи мя право глаголати о мне самом пред судиями. Не преставаяй и в темнице обличати беззаконнаго Ирода, даруй ми, да наипаче зде обличает мене совесть моя, да от обличении ея не возмогу на долзе времени утаити мое преступление. Аще же осужден буду понести наказание, даруй ми быти терпеливу, якоже ты сам терпеливно несл еси усекновение главы твоея, желанное от Иродиады. Ей, Крестителю Христов! Простри ми, рабу твоему, руку, крестившую Христа Спасителя моего, да мя извлечеши из глубины погибели. Ты еси больший всех в рожденных женами, ты еси первый по Богородице, праведник между человеки. Сего ради прибегаю к тебе аз, имеяй потребу в велицем ходатае, яко велик есмь грешник. Убо и да осенит мене, недостойнаго, благодать твоя, Предтече Господень.
Молитва заключенного к святителю Николаю Чудотворцу
О, великий чудотворче и угодниче Христов, святителю отче Николае! Ты, скорый помощник еси и благостынный заступник всем призывающим тя, паче же сущим в смертных бедах. Таковыя чудеса милосердия ты являл еси во дни жития твоего. Егда же, по смерти твоей, предстал еси Престолу Божию, по сем никтоже может исчислити милостей твоих, аще бы и многи языки имел. Ты сохраняеши плавающия по водам; ты многия утопающия спасл еси. Ты храниши в пути, ихже застигоша ветры, великий снег, лютый мраз, множайший дождь. Ты соблюдаеши домы и имения от запаления злонамеренных человек и всеконечнаго сожжения. Ты защищаеши сущия в пути от нападения злодеев. Ты пособствуеши нищим и убогим, избавляяй их от крайняго уныния и грехопадения, нищеты ради. Ты заступаеши невинныя от оклеветаний и неправеднаго осуждения. Ты спасл еси от самыя смерти триех мужей, в темнице седящих, имже определено бе посечение мечем. Тако, тебе даровася от Бога великая благодать молитися за человеки и спасати сущия в беде! Еще же ты прославился еси твоею помощию людем между неверными агаряны. Мне ли токмо, злосчастному и бедствующему, не поможеши, аще и сам аз сей жребий уготовах себе? Заступи убо и мене от уныния и отчаяния, зле обстоящих мя. О, великий угодниче Николае! Ты сам претерпел еси заключение в темнице за святую веру и, яко ревностный пастырь Христов, сам познал еси, сколь тяжко лишение свободы и во узах пребывание. Коль многим, молящимся тебе во узах, ты помогл еси! Облегчи и мне, сидящему в темнице, сие злоключение. Даруй ми скоро видети конец темничнаго моего пребывания и получити свободу, — не ради продолжения грехов моих, но ради исправления моея жизни! Помолися усердно и о сем, еже избавитися ми вечныя темницы, да твоею помощию спасаемь, прославляю Бога, дивнаго во святых Своих, аминь.
Молитва заключенного к Ангелу хранителю
Ангеле Божий, предстояй ми от купели святаго крещения! Колико аз, преогорчевах тебе злыми помыслы, скверными словесы и постыдными деянями в житии моем! Ктому же, не памятовах, яко имам тя даннаго ми от Бога хранителя. Егда аз упивахся вином, или безстудно плясах, или в блуде, хищениях и злоприобретениях иждивах житие мое: и в сии дни ты не отлучался еси от мене, но токмо, яко чистый дух, печален был еси о мне, непотребнем рабе. Коль множицею аз бых близ самыя смерти, творяй преступныя дела и отнюдь не помышляяй предстати внезапу Богу-Судии! Смерть же не постиже мене тогда: и вем, яко ты отвратил еси ю от мене. Тако выну охраняеши мя, и не един аз есмь, внегда един жительствую во узилищи сем, но с тобою, хранителю мой. Аще и не вижду тебе телесными очима, ты еси присно спребываяй окаянной моей душе и телу. Якоже солнце, преходя скверныя места, не оскверняется, сице и ты, светоносный Ангеле Божий, не возгнушайся моея смрадности, но николиже отлучайся от мене и в сей темнице. Сохрани мя здрава нощию и неприступна во сне диавольскому искушению. Отжени от мене безсоние. Сопутствуй ми, во дни, на кийждо час, во всех входех и исходех моих. Даруй ми крепость телесных сил, еже понести горькия работы, в наказание мне налагаемыя, горькия же паче по вине их. Заступи мя от злобы бесов, люте нападающих на мою душу: ибо от единаго мановения десницы твоея бежат беси. Паче же всего отжени от мене смятение душевное и ропот вредный: сый бо смущен сердцем, не хощу ни на кого и ни на что благоприятно взирати и присно зде огорчеваюся. Даруй очам моим слезы о гресех, устам же тихое глаголание. Не ступи от мене, святый Ангеле, и егда душа моя начнет разлучатися от тела, но предстани ми у смертнаго моего одра тих и радостен; ибо имам тогда видети тебе близ суща. Не остави и послежде мою душу, яже ти от Бога предана бысть непорочне, но яже по смерти моея имать судитися, яко оскверненная многими грехми. О, хранителю мой! Призови тогда помолитися о мне и прочия безплотныя силы, да твоим заступлением помилован буду, грешный раб (имя), во веки веков, аминь!
Молитвы о заключенных
Тропарь, глас 2
Манассию от уз и горькаго заточения молитв ради свободивый, всещедрый Боже, и раба Твоего, нами ныне молящагося, от уз и заточения свободи, и от всякаго злаго обстояния избави, яко един Человеколюбец.
Кондак, глас 5
Яко милосердия источник и благости пучина, Христе Боже, не презри в скорбех и бедах Тебе верою призывающих, но яко щедр, помилуй и от уз скоро свободи, да поем Ти: Аллилуиа.
Молитва ко Господу
Господи Иисусе Христе, Боже наш, святаго апостола Твоего Петра от уз и темницы без всякаго вреда свободивый, приими, смиренно молимтися, моление сие милостивно во оставление грехов раба Твоего (имя), в темницу всаженнаго, и молитвами того, яко Человеколюбец, всесильною Твоею Десницею от всякаго злаго обстояния избави и на свободу изведи.
Молитва оптинских старцев о даровании молитвы Иисусовой
Господи Иисусе Христе, Сыне Божий, имени Твоему покланяются Ангели и человецы, Твоего имени трепещут адские силы. Твое имя верное оружие на прогнание супостата, Твое имя попаляет грехи и страсти, Твое имя подает силу в подвигах, собирает воедино рассеянный ум и, во исполнении заповедей Твоих, обогащает добродетелями, Твое имя творит чудеса, и соединяет нас с Тобою, дарует мир и радость о Духе Святом, а в жизни будущей Царство Небесное. Сего ради я, недостойный раб Твой, молюся Тебе: прожени от нас неведение духовное, просвети познанием Божественной истины и научи нас незаблудно, во смирении, внимательно, с чувством покаяннаго сокрушения, устами, умом и сердцем творить непрестанно молитву сию: Господи Иисусе Христе, Сыне Божий, помилуй мя, грешнаго. Ты бо рекл еси, Господи, пречистыми устами Твоими: Аще что просите во имя Мое, то сотворю. Се молитвами Пречистыя Матери Твоей, святителя Иоасафа Белградскаго, святителя Николая Мирликийскаго, преподобнаго Серафима Саровскаго и всех преподобных отец наших о имени Твоем прошу молитвы пресвятаго и всемогущаго имени Твоего. Услыши мя, обещавый услышать всех призывающих Тя во истине. Твое бо есть еже миловати и спасати и даровати молящемуся во славу Твою со Отцем и Святым Духом. Аминь.
